Download Star Trek - The Kobayashi Alternative

Í þessum framhaldsleik The Promethean Prophecy ertu enn og aftur skipstjóri á geimskipinu Enterprise. Í fyrsta leiknum stoppaðiru bara við á skipinu í stutta stund en þú færð að nota skipið þitt miklu betur í framhaldinu. Nýjum glugga hefur verið bætt í leikinn sem sýnir stefnu og stöðu skips. Og, já, þú getur loksins gefið skipanir um hvert skipið á að fara og ferðast um stjörnuþokuna eins og þig lystir. Samt ekki alveg, af því að í byrjun leiks færðu skilaboð frá stjórnstöð Stjörnuflotans þar sem þér er sagt að finna skipið USS Heinlein sem hvarf með dularfullum hætti í stjörnukerfinu Tianguli. Þannig að ferðin til Risa sem þig hefur hlakkað svo til verður að bíða betri tíma.

Stjórnkerfið í leiknum er mjög svipað og í fyrri leiknum. Ein skemmtileg viðbót er að ef að önnur persóna talar við þig opnast nýr gluggi, og þú getur talað við hvern sem þú hittir. Ólíkt fyrri leiknum þar sem þú gast bara farið á milli nokkra svæða í skipinu þá geturðu núna farið hvert sem er. Öll dekk skipsins geta verið skoðuð og þú gætir fundið sitthvað sem kemur þér á óvart. Ef þú nennir ekki að skrifa hvert þú vilt fara þá ætti það að gleðja þig að þú getur notað örvatakkana til að hreyfa þig í staðinn fyrir að skrifa north eða aft. Þó skaltu ekki örvænta því allar aðrar skipanir eru enn til staðar og þú ræður yfir allri áhöfninni. Þú getur t.d. kallað McCoy upp í brú eða spjallað við Scotty í vélarrýminu og eru þeir allir í fullum karakter sem áður.

Þetta eru allt undirstöður að góðum leik en því miður fannst mér hann frekar pirrandi á tíðum. Það er alls ekki þar með sagt að þetta sé slæmur leikur, en miðað við The Promethean Prophecy er hann miklu erfiðari. Núna þarftu ekki bara að stjórna sjálfum þér, heldur heilu geimskipi. Þú hefur aðgang að tölvu skipsins sem gefur þér aðgang að öllum upplýsingum um undirmenn þína ásamt öðrum upplýsingum sem allir áhugasamir skipstjórar með einhvern vott af virðingu fyrir sjálfum sér ættu að vita. Þú getur ferðast að öllum plánetum í leiknum og geislað sjálfan þig niður eða sent könnunar lið. Það er svo margt hægt að gera og leikurinn er svo opinn að það getur virst yfirþyrmandi. Leikurinn er frekar strangur á skipanir og þarftu því að skrifa þær inn nákvæmlega rétt. En mesta hindrunin í leiknum fannst mér samt vera litla klukkan í horninu sem telur niður. Jamms, rétt hjá þér, leikurinn setur þér tímamörk þannig að þýðir ekkert að vera að drollast á einhverjum plánetum hér og þar eða þá að eyða tíma í að leita að káetunni hennar Uhuru (er ekki í leiknum, ég leitaði).

Ég prufaði leikinn í Windows XP, og hann virkar þar þannig að þú ættir ekki að lenda í neinum vandræðum með að koma leiknum í gang. Eins og í fyrri leiknum þá er afritunarvörn í þessum þannig að með leiknum fylgir forrit sem heitir NOKEY frá Central Point Software sem kemst fram hjá vörninni. Keyrðu bara upp Go.bat og haltu á vit ævintýranna.