Download Life and Death

Life And Death er hermir. “Hvernig hermir?” spyrðu kannski, en í Life And Death spilarðu skurðlækni á almenningssjúkrahúsinu Toolworks.

Það fyrsta sem þú sérð þegar þú byrjar leikinn er aðal gangurinn. Vinstra megin við þig er móttökustúlkan og er best fyrir þig að skrá þig inn áður en þú byrjar að vinna. Þegar þú ert búinn í innskráningunni byrjar gamanið og þú færð að gera eitthvað sem þig hefur alltaf langað að gera: greina sjúklinga.

Þú byrjar á því að pota hér og þar í kviðinn á sjúklingnum (oooj) og athugar viðbrögðin hjá þeim (bara ekki pota of mikið). Svo eru líka allskonar græjur til að létta þér lífið, eins og t.d. röntgenmyndavélin.

Þegar þú hefur loksins fattað hvað er að sjúklingunum (eftir að nokkrir hafa drepist) færðu að gera það skemmtilegasta í leiknum: UPPSKURÐUR! Jamm, þú átt að framkvæma skurðaðgerð á sjúklingnum, sem er langt frá því að vera auðvelt og getur orðið frekar sóðalegt ef þú ferð ekki varlega. Eins og þegar ég framkvæmdi mína fyrstu skurðaðgerð þá gleymdi ég að kveikja á gasinu.

Skurðaðgerðir eru líklega erfiðasti parturinn af leiknum, en sem betur fer er leiðbeininga bæklingurinn góður, enda leikurinn gerður af lækni. Þú átt líka eftir að komast í tæri við ýmis vandamál í aðgerðum, eins og til dæmis blæðingar og hjartavandamál. Ég var búinn með 50 manns áður en mér tókst fyrst að gera aðgerð, og las ég mikið til í leiðsögnum.

Allt í allt er Life And Death snilldar leikur og þú lærir mikið af honum, jafnvel þó svo að það sé frekar erfitt að klára hann. Kannski ekki leikur fyrir alla en endilega prófa – gæti vel verið að þú fílir hann.

Ég gef leiknum 5 af því að það eru mjög fáir leikir í þessum flokki og jafnvel enn færri sem eru abandonware.